Comments (3)

By samnvay, December 19, 2011 4:32 pm

અચાનક આપણું મળી જવું,એ ઈશ્વરીય સંકેતસમુ લાગે
ઈશ્વરે રચેલા સંબધોની ગાંઠ કોઇથી છુટતી નથી હોતી

તું દૂર રહે કે મારી નજીક રહે કંઈ ફરક પડે નહી મને
આપણા પ્રેમની સાંકળ અણસમજથી તુટતી નથી હોતી

ચાહવા માટે અક્ષરોની લાગણી જ કાફી નથી
તને ચાહીને લાગણીની ભાષા બીજું કૈ ઘુંટતી નથી હોતી…

- નરેશ કે.ડૉડીયા

Comments (3)

By samnvay, November 1, 2011 5:02 pm

શ્રીમુકેશ જોષીની સુંદર શબ્દોથી કંડારેલી આ રચના, મિત્ર શ્રી કેદારભાઈ ઉપાધ્યાયનાં સ્વરાંકન તેમજ મધુર સ્વરમાં પ્રસ્તુત છે..!

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

તમે કોઈ દિવસ પ્રેમમાં પડ્યા છો ?

એકાદી મુઠ્ઠીનું અજવાળું આપવા…આખીય જિંદગી બળ્યા છો ?

તમે લોહીઝાણ ટેરવાં હોય તોય કોઈના..મારગથી કાંટાઓ શોધ્યા?

તમે લીલેરા છાંયડાઓ આપીને કોઈના..તડકાઓ અંગ ઉપર ઓઢ્યા?

તમે એકવાર એનામાં ખોવાયા બાદ..કદી પોતાની જાતને જડ્યા છો?

તમે કોઈની આંખ્યુંમાં વીજના કડાકાથી..ખુદમાં વરસાદ થતો જોયો?

તમે કોઈના આભને મેઘધનુષ આપવા..પોતાના સૂરજને ખોયો?

તમે મંદિરની ભીંત ઉપર કોઈની જુદાઈમાં..માથુ મૂકીને રડ્યા છો ?

તમે કોઈ દિવસ પ્રેમમાં પડ્યા છો ?

***

Comments (0)

By samnvay, October 29, 2011 9:21 am

***

આપણુ જીવન એક ટી. વી. સિરીયલ છે અને તેના દિગ્દર્શક – ‘ભગવાન’ છે ..આપણા જીવનની પટકથાના લેખક – ‘વિધાતા’ છે .. દરેક એપીસોડની જરૂર મુજબ આપણા જીવનના અમુક મોડ પર, પાત્રો ( કિરદાર )ની આવન જાવન લખતા રહે છે ..! અને દરેક માનવી રૂપી અભિનેતા એકબીજાના જીવનમાં પોત-પોતાનો રોલ નિભાવવા આવીને જતા રહે છે ..!

***

Comments (5)

By samnvay, October 18, 2011 12:17 pm

***

મિત્રો, આજના જેટયુગ સોરી, નેટયુગમાં આપણે હવે ઈશ્વરને પણ નેટ જગતમાં પ્રગટ થવા આમંત્રણ ( ફ્રેન્ડ રિક્વેસ્ટ ) મોક્લવી પડે એવુ નથી લાગતુ ?

આવી જ એક વાત ગુજરાતી બ્લોગજગતના માનનીય સભ્ય શ્રી-દેવિકાબેનનાં શબ્દોમાં પ્રસ્તુત છે.

શમણાંમાં આવીને પૂછ્યું છે રાજ્જા,

તો કહી દઉં છું સીધુ તું સાંભળ હે કાના,

નથી હું મીરાં કે નથી કોઇ રાધા,

શબરી નથી કે કરું બોર હું અજીઠાં.

મારે તો વનરાવન કે મથુરા,

કદમ્બ કે ગોકુળ સઘળું યે વેબમાં !

તેથી ફરું હું તો નેટના જગતમાં,

તારા તે જગમાં ક્યાં હવે છે મણા ?

આવીને મળે તો માનું અહીં વેબમાં,

જોજે ભૂલીશ મા, કે’જે ઇમેઇલમાં,

વેબકેમ મંદિરના ખોલી દઇશ બારણાં,

આરતી ઉતારીને લઇશ ઓવારણા.

પૂજું તો છું જ આમ રોજ રોજ શબ્દમાં,

પામીશ ધન્યતા અક્ષરના ધામમાં,

અર્પી સર્વસ્વ તને બાંધીશ વચનમાં,

છોડી દે વાંસળી ને ખેરવી દે મોરપીંછ.

છેડી દે સ્નેહસૂર ને ફેરવી દે પ્રેમપીંછ,

ખીલવી દે ક્યારો આ વિશ્વના બાગમાં,

શમણાંમાં આવીને પૂછ્યું છે રાજ્જા,

તો કહી દઉં છું સીધુ તું સાંભળ હે કાના..!!

***

- દેવિકાબેન ધૃવ ( USA )

Comments (4)

By samnvay, October 9, 2011 8:21 pm

પ્રિય મિત્રો,

ગુજરાતી બ્લોગ જગત માટે સર્વ પ્રથમ ”શ્રેષ્ઠ ગુજરાતી બ્લોગ સ્પર્ધા” શરૂ કરવામાં આવી છે, જેના આયોજકો છે, માનનીય શ્રી કાંતિભાઈ કરસાળા, શ્રી વિજયભાઈ શાહ, શ્રી જીજ્ઞેશભાઈ અધ્યારૂ. આ નવા પ્રયાસ માટે આયોજકોને ખૂબ ખૂબ અભિનંદન.!

આ સ્પર્ધાનો હેતુ હાર-જીત નહીં, પરંતુ ગુજરાતી બ્લોગ્સની આગવી ઓળખ માટે તથા ગુજરાતી ભાષાને વિશ્વ-વ્યાપી બનાવવાનો જ પ્રયાસ માત્ર છે .. આ કાર્ય દ્વારા આપણી માતૃભાષાને વિશ્વમાં ઊચ્ચ દરજ્જો પ્રાપ્ત થાય, પરદેશ વસનારા આપણા ગુજરાતીઓ કે જેઓ ગુજરાતી બ્લોગ જગતથી અજાણ છે, એમને પણ આ નવા વિશ્વમાં એક આત્મિયતા નજર આવશે .. ‘મારું ગુજરાત – મારી માતૃભાષા’ આ સુત્ર એક મંત્ર બની માનસપટ પર ગુંજતુ રહેશે … આ માટે દરેક મિત્રોને વિનંતી કે એમના મિત્ર મંડળ સુધી આ સ્પર્ધાની માહિતી પ્રસરાવે અને પસંદગીના યોગ્ય બ્લોગ્સ ને મત આપવા પ્રોત્સાહિત કરે ..!

ગુજરાતી બ્લોગ જગતમાં અત્યારે લગભગ – ૯૫૦ થી વધુ બ્લોગ્સનાં નામ પ્રમાણે બનેલી યાદીમાંથી આપે આપના પસંદગીના પાંચ બ્લોગ્સને મત આપવાના છે. મત આપવાની પ્રક્રિયા સરળ છે…. આપને ગમતા પાંચ બ્લોગના નામ અને તેની વેબકડી (url) ફરજીયાત) અને આપને એ બ્લોગ્સ / વેબસાઈટ્સ કયા કારણે ગમે છે? (મરજીયાત) એ આપે આ સાઇટ – ગુજરાતી બ્લોગજગતને એક તાંતણે બાંધતી કડી.પર પ્રતિભાવ તરીકે મૂકવાના છે. મત આપવાની છેલ્લી તારીખ છે ૧૫ ઑક્ટોબર.

આપના મતોને આધારે સૌથી વધુ મત ધરાવતા પ્રથમ ૨૫ બ્લોગ્સ / વેબસાઈટ નિર્ણાયકો સુધી પહોંચાડવામાં આવશે.

એ યાદીમાંથી વિવિધ ક્ષેત્રવાર ગુણવત્તા ચકાસણીને અંતે નિર્ણાયકો દ્વારા પ્રમુખ ગુજરાતી બ્લોગ (૧૦) વિજેતાઓ નક્કી કરાશે.

ખાસ જણાવવાનું કે, આયોજકોના / નિર્ણાયકોના બ્લોગ્સ આ સ્પર્ધાની બહાર છે, જે નીચે મુજબ છે, જેને મત આપી શકાશે નહીં.

કૃષ્ણકાંતભાઈ ઉનડકટ (તંત્રીશ્રી, સંદેશ) http://krishnkantunadkat.blogspot.com

જયશ્રીબેન ભક્તા પટેલ (ટહુકો વેબસાઈટના સંચાલક) http://tahuko.com

નીલમબેન દોશી (વાર્તાકાર અને બ્લોગર) http://paramujas.wordpress.com

વિશાલભાઈ મોણપરા (વેબ ડેવલપર અને કવિ ) http://www.vishalon.net

ચેતનાબેન શાહ (સમન્વય વેબસાઈટના લેખિકા / સંચાલક) http://samnvay.net

વિનયભાઈ ખત્રી (ફનએનગ્યાન વેબસાઈટના સંચાલક) http://funngyan.com

જીજ્ઞેશભાઈ અધ્યારૂ (અક્ષરનાદ વેબસાઈટ સંપાદક) http://aksharnaad.com

જીજ્ઞેશભાઈ અધ્યારૂ (અધ્યારૂ નું જગત બ્લોગના સંચાલક) http://adhyaru.wordpress.com

વિજયભાઈ શાહ (વિજયનું ચિંતન જગત બ્લોગના સંચાલક) http://www.vijayshah.wordpress.com

કાંતિલાલ કરસાળા (ઋષિચિંતન વેબસાઈટના સંચાલક) http://rushichintan.com

***

વધુ માહિતી માટે -
http://netjagat.wordpress.com/2011/10/01/gujarati-blog-world-toppers/

***

Comments (2)

By samnvay, September 23, 2011 10:07 am

માણસ જિંદગીમાં બે વખત બદલાઈ જાય છે.
એક, જયારે કોઈ એની જિંદગીમાં આવે છે અને
બીજું, જયારે કોઈ એની જિંદગીમાંથી જતું રહે છે..!!

***

-અજ્ઞાત

Comments (14)

By samnvay, September 20, 2011 3:45 pm

મિત્ર શ્રી કૃષ્ણકાંતભાઈ ઉનડકટ લિખિત આ લેખ એકદમ હ્રદયસ્પર્શી અને વાસ્તવિક્તા-પૂર્ણ છે, આપ સહુને પણ જરુર ગમશે ..!!

***

કોઈના વગર કંઈ અટકતું નથી. આ વાત સાચી નથી. એક વ્યક્તિ ન હોય ત્યારે આપણું ઘણુંબધું અટકી અને ભટકી જતું હોય છે. પોતાની એક વ્યક્તિની ગેરહાજરી આખી સૃષ્ટિમાં શૂન્યવકાશ સર્જી દે છે. અને એ જ વ્યક્તિ સાથે હોય ત્યારે આખું જીવન ભર્યુંભર્યું લાગે છે

નફા ને ખોટનો ખ્યાલ ન કર, ફકીર સાથે ભાવતાલ ન કર,

કેમ કે તું નથી તારી મિલકત, દોસ્ત તારામાં ગોલમાલ ન કર.

- અદમ ટંકારવી

જિંદગી દરરોજ માણસને સવાલો કરતી રહે છે. કેટલાક સવાલો સરળ હોય છે અને કેટલાક અઘરા. સૌથી પહેલો સવાલ એ કે જિંદગી શું છે? દસ માણસોને આ સવાલ પૂછીએ તો કદાચ બધા પાસેથી અલગ અલગ જવાબ મળે. તમને કોઈ પૂછે કે જિંદગી શું છે? તો તમે શું જવાબ આપો? જિંદગી વ્યાખ્યા કરવાની વસ્તુ નથી. જિંદગી વ્યાખ્યા મુજબ ચાલતી પણ નથી. જિંદગી તો જીવવાની એક ઘટના છે. જિંદગીમાં અઢળક ખૂબી છે. ક્યારેક એવું લાગે છે કે આખી દુનિયા મારી છે અને ક્યારેક એવું લાગે છે કે આખી દુનિયામાં મારું કોઈ નથી. આ દુનિયામાં આપણા અસ્તિત્વનો મતલબ શું છે? જિંદગીની ઘણી ફિલસૂફી આજકાલ એસએમએસ અને ઇ-મેલમાં ફરતી રહે છે. રોજ સવારે બે-ચાર મેસેજ મોબાઇલ પર મળી જાય છે જેમાં દોસ્તી, સંબંધ અને પ્રેમથી માંડી જિંદગીની ફિલોસોફીની વાતો હોય છે. ઈ-મેલની મોટિવેશનનાં પડીકાં આવતાં રહે છે અને ફરતાં રહે છે. પાવર પ્રેઝન્ટેશનની સ્લાઇડ્સ પરત દર પરત ઊઘડતી રહે છે. ઘણા મેસેજ અને ઈ-મેલ ખરેખર દિલને સ્પર્શી જાય એવા હોય છે. પણ તમે ક્યારેય આ સંદેશાઓને સવાલો કર્યા છે? તમને જે વાત કહેવામાં આવી છે એ વાત સાચી છે કે ખોટી એનો તમે વિચાર કરો છો? આપણે મોટા ભાગે કોઈની વાત શા માટે માની લેતાં હોઈએ છીએ? હમણાં એક ઈ-મેલ આવ્યો. હું કોણ છું? એ પછી ઈ-મેલ ઉઘડતો ગયો.આવડું મોટું વિશ્વ, તેમાં પણ અનેક ગ્રહો, તેમાં એક ગ્રહ એટલે આપણી ધરતી. ધરતીના પણ અનેક ખંડો, એક-એક ખંડમાં અનેક દેશ, એક ખંડમાં આપણો દેશ. આપણો દેશ પણ પાછો કેવડો મોટો! કેટલાં બધાં રાજ્યો! એમાં એક આપણું રાજ્ય. આ રાજ્યમાં આપણું એક શહેર. આપણા શહેરમાં પાછા અનેક વિસ્તારો. તેમાં એક આપણો વિસ્તાર,આ વિસ્તારમાં અનેક ગલી, ફળિયાં કે સોસાયટી. એમાં એક આપણું ઘર. આપણા ઘરમાં બે-ચાર કે પાંચ-દસ લોકો. એમાં એક આપણે. માઇક્રોસ્કોપમાં પણ ન દેખાય એવું આપણું અસ્તિત્વ. સરવાળે એવું કે તમે કંઈ જ નથી! તમારા પહેલાં અબજો લોકો આવી ગયા છે અને તમારા પછી પણ આ દુનિયા અટકવાની નથી. રાઇટ. તો પછી સવાલ એ થાય કે ખરેખર આપણી જિંદગીનું કોઈ જ મહત્ત્વ નથી? ના સાવ એવું નથી. તમે દૂરબીન જોયું છે ને? દૂરબીન તમને દૂર હોય એને સાવ નજીક દેખાડે છે. પણ એ જ દૂરબીનને જો ઊંધું કરી દઈએ તો જે નજીક હોય એ પણ દૂર લાગે છે. જિંદગીનું પણ એવું જ છે. તમે જિંદગીને કઈ બાજુથી અને કેવી રીતે જુઓ છો એ મહત્ત્વનું છે. જિંદગીમાં તમારું મહત્ત્વ છે, તમે છો તો જ આખી દુનિયા છે.

આપણે કહીએ છીએ કે કોઈના વગર કંઈ અટકતું નથી. આ વાત સાચી નથી. એક વ્યક્તિ ન હોય ત્યારે આપણું ઘણુંબધું અટકી અને ભટકી જતું હોય છે. પોતાની એક વ્યક્તિની ગેરહાજરી આખી સૃષ્ટિમાં શૂન્યવકાશ સર્જી દે છે. અને એ જ વ્યક્તિ સાથે હોય ત્યારે આખું જીવન ભર્યુંભર્યું લાગે છે. દુનિયામાં કંઈ જ તુચ્છ નથી. બધું જ ભવ્ય છે. બધાંનો મતલબ છે. તમારો પણ કંઈક ઉદ્દેશ, કંઈક અર્થ અને કંઈક મર્મ છે. સૌથી યાદ રાખવા જેવી કોઈ વાત હોય તો એ એક જ છે કે તમે ભલે દુનિયાના એક નાનકડા અંશમાત્ર હોય પણ તમે કોઈની આખી દુનિયા છો.

તમે ક્યારેય વિચાર કર્યો છે કે હું એક ન હોવ તો કોને ફેર પડે છે? ઘણાંને ફેર પડતો હોય છે, કારણ કે તમે કોઈની આખી દુનિયા છો. એને ફેર પડે છે જે તમને ફોન કરીને પૂછે છે કે તું જમ્યો? તું કેમ છે? તારે જ્યાં જવું હતું ત્યાં પહોંચી ગયો? તું ક્યારે આવીશ? તારા વગર મને ગમતું નથી! તું જલદી આવી જા ને! જે તમારી રાહ જુએ છે એને ફેર પડે છે. તમે દૂર હોવ ત્યારે કોને અધૂરું લાગે છે? તમે એના માટે આખું અસ્તિત્વ છો. તમને કોઈએ ક્યારેય એવું કહ્યું છે કે તું મારી દુનિયા છો? કોઈ જાય ત્યારે તમને એવું લાગે છે કે જાણે આખી દુનિયા હાથમાંથી સરકી ગઈ? હા, એવું થતું હોય છે. ઘણી વખત કોઈનો અવાજ ન સાંભળીએ તો પણ સન્નાટા જેવું લાગે છે. પક્ષીઓનો કલરવ અને પ્રકૃતિનું સૌંદર્ય તો જ માણવા જેવું લાગે છે જો કોઈ આપણી સાથે હોય. એક વ્યક્તિની ગેરહાજરીથી બધું જ વ્યર્થ લાગે છે. કંઈ જ સૂઝતું નથી. બધું જ ધૂંધળું અને બિહામણું ભાસે છે. વિરહને તમે ધ્યાનથી નિરખજો, એની બીજી બાજુ છલોછલ પ્રેમ ભર્યો હોય છે. વિરહનો મતલબ તો જ છે જો પ્રેમ હોય! પ્રેમ વગરનો વિરહ ન હોય. વિરહ તો જ આકરો લાગે જો પ્રેમ તીવ્ર હોય.
આપણી ગુજરાતી ભાષામાં એક શબ્દ છે, અહાંગળો. કોઈ એક વ્યક્તિ વગર માણસ ઓગળી જાય છે. પોતાની વ્યક્તિને ગમતું કંઈ નજરે પડે તો આંખો ભીની થઈ જાય છે. જમતી વખતી વિચાર આવી જાય છે કે એ જમ્યો હશે? કે એ જમી હશે? માત્ર પ્રેમીઓ કે પતિ-પત્નીની જ આ વાત થઈ. કોઈ પણ સંબંધમાં આવું થઈ શકે છે. સાસરે ગયેલી દીકરી હોય કે દૂર ભણવા કે નોકરીએ ગયેલો દીકરો હોય! કે પછી એક મિત્ર હોય!
ઘણી વખત સાત મિત્રો હોય પણ એક મિત્રની ગેરહાજરીથી પાર્ટી અધૂરી લાગે છે. બધાં મળીએ ત્યારે એ જ વાત થાય કે એ નથી, એ હોય તો જલસો પડી જાય. આવા સમયે મિત્રને ફોન કરીને કહીએ છીએ કે યાર બધાં છે પણ તું નથી. વી મિસ યુ લાઇક એનિથિંગ. દૂર રહેલા મિત્રને પણ દોડીને કે ઊડીને ત્યાં પહોંચી જવાનું મન થાય છે પણ જઈ શકાતું નથી. આંખના કોરાણે કંઈક ભેજ જેવું લાગે છે. બસ આ તમારી દુનિયા છે અને તમે એની દુનિયા છો. કોઈ પણ એવો પ્રેમી કે પ્રેમિકા નહીં હોય જે વિરહની ઘડીમાં પોતાની વ્યક્તિને યાદ કરી એટલિસ્ટ એક વાર રડી નહીં હોય! મારે કંઈ નથી જોઈતું, બસ તું આવી જા! તું હોય તો એવું લાગે છે જાણે બધું જ મળી ગયું! હા, તમે એક ન હોવ તો ઘણાને ફેર પડે છે.

તમે બસ આટલું કરો કે તમારાથી જેને ફેર પડે છે એને તમે જતનપૂર્વક સાચવી રાખો, અઢળક પ્રેમ કરો, કારણ કે તમો એની દુનિયા છો, અને એ જ તમારી દુનિયા છે…!

છેલ્લો સીન -
આપણે બધા પ્રેમ કરવા માટે જ જન્મ્યા છીએ. આ જ અસ્તિત્વનો સિદ્ધાંત છે અને એકમાત્ર અંત છે.

- શ્રી કૃષ્ણકાંત ઉનડકટ

Comments (3)

By samnvay, August 31, 2011 12:09 am

જીવનમાં ના જાણે, ક્યારે, કઈ ઘડીએ, કોની જોડે, ક્યા જન્મનું, કયું ઋણાનુબંધ નીકળી આવે છે, કંઈ જ ખબર નથી પડતી, ને આ જ તો જીવનની મોટી અજાયબી છે …!!!

***

Comments (6)

By samnvay, August 18, 2011 5:22 pm

મિત્રો, આજે માણીએ સુપ્રસિદ્ધ ગઝલકાર ‘મરીઝ’ ની આ ગઝલ શ્રી અનુરાધા પૌડવાલના સુમધુર સ્વરમાં …સિતાર-બંસરી-તબલા મિશ્રિત સંગીત પણ મધુરું બન્યું છે…

એ સૌથી વધુ ઉચ્ચ તબક્કો છે મિલનનો,
કહેવાનું ઘણું હો ને કશું યાદ ન આવે..!

કેવો સુંદર આ શેર ..!!!

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

એવો કોઇ દિલદાર જગતમાં નજર આવે,
આપી દે મદદ કિતું, ન લાચાર બનાવે.
હમદર્દ બની જાય, જરા સાથમાં આવે,
આ શું કે બધા દૂરથી રસ્તા જ બતાવે !
શું એને ખબર, કોની નજર પ્યાસી રહી ગઇ ?
જે ભેજમાં ચાલે અને પાલવ ન ઉઠાવે.
એ સૌથી વધુ ઉચ્ચ તબક્કો છે મિલનનો,
કહેવાનું ઘણું હો ને કશું યાદ ન આવે.
વાતોની કલા લ્યે કોઇ પ્રેમીથી તમારા,
એક વાત કરે એમાં ઘણી વાત છુપાવે.
રડવાની જરૂરત પડે ત્યાં સુકા નયન હો,
ને હસતો રહું ત્યાં જ જ્યાં હસવું નહિ આવે.
છે મારી મુસીબતનું ‘મરીઝ’ એક આ કારણ,
હું મુજથી રૂઠેલો છું, મને કોણ મનાવે ?

***

Comments (6)

By samnvay, August 9, 2011 1:43 am

આજે નાની બહેન સમી દિગિશાને જન્મદિને હાર્દિક શુભેચ્છાઓ સહ તેની એક સુંદર રચના પ્રસ્તુત છે …

તારી સાથ સાથ રહેવું છે મોહન,
મારે હરદમ સાથ રહેવું છે મોહન,

તું જો બને બંસરી, સાત સૂર હું બની જાઉ,
હોઠોં પર સાથે નાચીશું મોહન,
મારે હરદમ સાથ રહેવું છે મોહન,

તું જો બને મુકુટ, મોરપિંછ હું બની જાઉ,
મસ્તક પર સજીશું મોહન,
મારે હરદમ સાથ રહેવું છે મોહન,

તું જો બને પુષ્પ, સુતર હું બની જાઉ,
હ્રદય પાસે મળીશું મોહન,
મારે હરદમ સાથ રહેવું છે મોહન,

તું જો બને ચંદન, કેસર જળ હું બની જાઉ,
લલાટ પર લીપાઇશું મોહન,
મારે હરદમ સાથ રહેવું છે મોહન,

તું જો બને નટખટ કાનજી,રાધા હું બની જાઉ,
રાસની રમજટ જમાવશું મોહન,
મારે હરદમ સાથ રહેવું છે મોહન,

તું જો બને જ્ઞાન, ભાવાર્થ હું બની જાઉં,
ગીતામાં લખાઇશું મોહન,
મારે હરદમ સાથ રહેવુ છે મોહન,

તું જો બને શબ્દો,રાગ હું બની જાઉ,
કિર્તનમાં ગવાઇશું મોહન,
મારે હરદમ સાથ રહેવુ છે મોહન.

***

-દિગિશા શેઠ પારેખ